ஐ.டி. துறையில் பணியாற்றும் அபி (ஷில்பா மஞ்சுநாத்), மகா (ஷாஸ்வி பாலா), நிஷா (சுபாப்ரியா மலர்) மூவரும் பார்ட்டிக்கு செல்வது, மது அருந்துவது, போதை மருந்து உட்கொள்வது என்று பொழுதைக் கழிக்கிறார்கள். ஐடி பணியில் திறமை மிக்கவர்களாக இருந்தாலும் வேலை அழுத்தம் காரணமாக அலுவலகத்திலேயே போதை மருந்து உட்கொள்ளும் அளவுக்கு அப்பழக்கத்துக்கு அடிமையாகி இருக்கிறார்கள். தங்கள் சக ஊழியர்கள் தீபா, விக்ரம் ஆகியோரின் திருமணத்தைக் கொண்டாடுவதற்காக ஒரு நாள், பார்ட்டிக்கு செல்கிறார்கள். மது போதையில் இருக்கும் தீபா உட்பட நான்கு பெண்களும் மர்ம நபரால் (நட்டி என்கிற நட்ராஜ்) கடத்தப்படுகிறார்கள். ஒரு பாழடைந்த வீட்டுக்குள் நாள்கணக்கில் அடைத்துவைக்கப்பட்டு கொடுமைப்படுத்தப்படுகிறார்கள். அங்கு ஏற்கெனவே கடத்தி வைக்கப்பட்டிருக்கும் இன்னொரு பெண், துன்புறுத்தப்படுகிறார். அங்கிருந்து தப்பிப்பதற்கான அனைத்து முயற்சிகளும் தோல்வியடைகின்றன. காவல்துறையும் இவர்களை மீட்க முடியாமல் திணறுகிறது. அவர்கள் ஏன் கடத்தப்பட்டார்கள், அவர்களுக்கு இறுதியில் என்ன ஆனது? என்கிற கேள்விகளுக்கு விடை சொல்கிறது மீதிப் படம்.
அறிமுக இயக்குநர் ஹாரூண் இயக்கியிருக்கும் இந்தப் படம், ஐடி போன்ற அதிக ஊதியம் தரும் பணிகளில் இருப்போர் மது, போதை மருந்து உள்ளிட்ட தீய பழக்கங்களுக்கு அடிமையாவது குறித்த அக்கறையை வெளிப்படுத்தி இருக்கிறது. அதே நேரம் இந்தப் பிரச்சினை குறித்து பார்வையாளர்களிடம் உரிய தாக்கம் செலுத்தும் வகையிலான திரைக்கதை அமைக்கத் தவறியிருக்கிறார்.
from இந்து தமிழ் திசை : News in Tamil, Latest Tamil News India & World, Cinema, Hindu Tamil Thisai Daily Newspaper Online: தமிழால் இணைவோம்